Wun Pawng Shayi - tsawm la ai ngu yang

Mungkan n tsa hta Wun Pawng Shayi daram si mani tsawm htap ai hte sari rawng ai n nga ai ngu a rawng la lai wa sai. Chya sam myu sha ni a man hta mung a rawng la shakawng lai wa sai. Manaw manang ni a tsun a dawt ai lam ni hpe mung law law lang hkrum sha lai wa sai. Tim n dai laika hpe n ka shi ai ten du hkra Wun Pawng Shayi ni a maga de jan rai naw tsap nang nga ai re.
Lana mi na nhtoi hta manam wa a ga san hpe gara hku htai ya na hpe n chye mat, mak mat lai wa sai. Ngai a myit hta yawn ai myit ni, gaya ai myit ni byin pru lai wa sai. Ngai manu shadan tawn ai, Ngai arawng la ai Wun Pawng Shayi ni wa manam manang wa a ga san hpe n lu htai ya, n chye htai ya mat hkra galaw kau dat ya ma sai.
Dai shana hta Ngai a Bar kaw tsa gayau ai bungli hpe galaw nga yang, Ngai a tsa Bar shawng na Beer Bar kaw Ngai manu shadan ai Wun Pawng Shayi lahkawng sa dung let Beer sa lu taw ai hpe mu dat n ngai. Jing hpaw ga she sheng nga hkra sa garu dung nga ma ai. Buhpun mawn sumli ai lam hta prat dep ai she ngu na kun? prat hpe hkan sha chyut ai she ngu na kun?.. gadun sai i gadun sai nga labu hpe she lata bu sa ma ai, Ngai a nya ai majaw rai na kun?.. Ngai pi n chye shamying ai palawng (palawng ngu pi tsun n mai ai) hpe sha shakap tawn rai Beer lu dung nga ma ai le. Maigan myu sha ni a lapran lata kaw malut hka yawm sha mi matep kau rai a pyaw taw nga ma ai. Aw ... sari rawng la ai Wun Pawng Shayi ni!!!
Beer Bar kaw sa dung lu nga ai manam ni gaw, Shat Nga kasha hpe htim a mya sha hkyen ai Sharaw a myi zawn rai, dai Wun Pawng Shayi yan hpe a zi yu nga ma ai hpe ngai mu lu n ngai. Ngai a Bar kaw sadung lu nga ai manam ni a myi mung dai Wun Pawng Shayi yan hpang de chyu du mat nna, tsa gawm hpe hta lang pi malap nga ma ai. Ngai a Bar kaw na manam ni Ngai hpe hkap san shajang ma ai hta..,
“dai yan hpe nang chye ai i ...?”
“gara kaw na rai ma a ta ...?”
“...........................................?”
“...........................................?”
“...........................................?”
Shan hte a ga san ni hpe Ngai Wun Pawng Shadang langai gara hku htai ya na rai ta..? Anhte a Wun Pawng Shayi ni re nga arawng mi a lu Ngai tsun dan ra na i? Nye a amyu ni re ngu n gun mi alu rai htai ya ra na i? Nang Wun Pawng wa Ngai a shara kaw Nang lama rai yang ganing ngu htai ya na rai ta?
Ngai gaw manam ni hpe dai ni hpe ngai n chye ai ngu myit yawn la let htai dat ya n ngai. N dai hku htai dat ya ai a marang e Nye a, a myu hpe Ngai nyet kau sai kun? Wun Pawng Shayi ni hpe masha maigan wa a man hta nyet kau ai tai mat sai kun? Dai hku byin mat ai rai yang mung Wun Pawng yawng hpe mara raw ya rit ngu hpyi lajin dat lu n ngai. Ngai tsaw ra manu shadan tawn ai Wun Pawng Shayi yen Ngai hpe chye na ya na hpe kam ai. Wun Pawng Myu Sha ni yawng mung ngai hpe chye na ya na hpe kam ai. Wun Pawng Shayi ni myi hpaw, na na wa ai ngu na i? Wun Pawng Shayi di prat dep wa masai ngu hkap la ra na i?
Wun Pawng Shayi yan e Nan lu bang dat ai Beer hte rau Nan a sari, Wun Pawng Shayi ni yawng a sari ni hpe lu bang shalawm kau ai hpe dum nga ai kun? Nan nat shamawng kau dat ai malut hkayawm hte rau Nan a arawng sadang, Wun Pawng Shayi ni yawng a arawng sadang ni yawng hpe nat shamawng kau ai hpe dum nga ma ai kun? Prat ting makawp maga lai wa ai sari sadang ni hpe jahkring na laman shamat kau sa na ma ai kun?
Ya na zawn lu sha ai hpe mara ngu tsun ai n re, Nan lu sha ai hpe mung mara ngu n mu ya n ngai. Lu ga sha ga, pyaw chyai ga. Tim..., shadawn shadang ngu ai hpe chye ga, shara hte masa hpe yu na lu ga, pyaw ga. Lu na sha na matu Madu Karai hpan da ya ai zawn, kaja ai hte n kaja ai hpe gin hka chye na myit nyan hpaji hpe mung Madu Karai jaw da ai hpe gaw n malap kau ga. Wun Pawng Shayi ni a sari hpe nan a majaw sha n shayawm, shamat kau ga. Tsawm htap manu dan la ai Wun Pawng Shayi ni a sari hpe makawp maga nga ga. Tsawm htap la ai Wun Pawng Shayi ni a gawng shingyan hpe manu shadan nga ga Wun Pawng Shayi yan e.

Mut Tsawm
24th August, 2009

Hpyi lajin dat ai: : N dai laika hpe n ka ging ai ka kau ai rai yang mara raw ya marit ngu Wun Pawng Shayi ni yawng hte Wun Pawng Myu Sha ni yawng hpe hpyi lajin dat n ngai.

KRC

Wun Pawng Myu Sha ni law, Malaysia ngu ai mungdan kaw
Wun Pawng Mungdan hpe kau da, Malay ga de hprawng sa wa
Chye ai hku mi tam sha, Malaysia mungdan kata
Dum bru dim bra rai di nga, Wun Pawng Myu Sha ni wa
KRC ngu ai mi hpaw da, Wun Pawng Myu Sha ni a matu nga
Li la ai lit hpe shi gun da, Wun Pawng Myu Sha ni hpe lakawn la na
Wun Pawng ni lawt lu hkra, n sim n sa Shi shakut ya
A ten a hkying shi n yu, Wun Pawng Myu Sha ni a matu
Wun Pawng wa jam jau ai hpe na, lang dat Shi du saw a
Myu baw shang shi n yu, Wun Pawng ni a matu chyu
N kam ai nga di Shi n nga, Wun Pawng ni a matu wa
Wun Pawng ni lawt lu na lam, Maja let galoi ma Shi tam
Wun Pawng ni jahkrit shama, tut e Shi hkrum sha
Sat na nat na nga mung tut, tim hpang de Shi galoi n hting nut
Wun Pawng ni a matu nga, yawng a shawng kaw Shi tsap ya
KRC ngwi pyaw nga u ga nga, tut e ngai kyu hpyi ya
Myit mang ai lam yawng awng dang, tut kyu hpyi ya ding yang

Shd. Mut Tsawm
24th July,2009
"KRC" "Shi" ngu ai gaw KRC magam gun ni yawng hpe tsun mayu ai re.

SAMA HKOI AI NAMPAN

Wunpawng Shayi hpe shachyen la,
Kanam mi she ang taw nga
Shi a tsun shaga lam ni hta,
N myit mada yawng lawm mat sa
Kyang lai len mung grai tsawm ai,
Yawng yawng e jawm shakawn sai
Shi a lam bai sagawn yu,
Sama hkoi ai nampan she lu
Tsaw ra myit a majaw sha,
Matsan dum ai myit ni byin pru wa
Gawng shingyan grai tsawm ai,
Tsaw ra ai lam tsun kau sai
Sum tsaw mung kan kata,
An lahkawng hkrai pyaw di nga
Jing hku jing yu ni shang shanut,
An lahkawng mung nga n ngut
N daw n hka saga i nga,
Ga sadi ni mung tawn da ai wa
Malay ga de run,
Rau sha lata gin dun
Myit mada ai lam ni n byin wa,
Shada n gun jaw hkat let nga
Sama hkoi ai nampan rai ai ngu,
Ngai gaw kawn she kawn ai lu
Malay ga nga ai grai na wa,
Sama hkoi ai nampan mung galai shai wa
Ngai gaw hkum mayu ai myit ni byin pru,
Shi gaw n rau ai aten ni chyu
N myit mada tsin yam letmat shi lu la,
Ngai hpe mung n dum mat a hka
Manang ni ngai hpe tsun shadum,
Laga tam la u nga kaw she jahtum
Na a sama hkoi ai nampan wa,
Grai myit kaba mat sai she bai nga
Ngai gaw myit n pyaw di nga,
Shi gaw manang ni hte alum ala
Sama hkoi ai nampan a matu nga,
Galoi mung ngai akyu hpyi ya

Shd. Mut Tsawm
18th July,2009 (6:54pm)

Manang langai a hkam sha ai lam hpe ka shagawp da ai re

UN = NU A KANAM

Ngai Jinghpaw Shadang wa
Wunpawng Buga hpe kau tawn da,
Gumhpraw tam na ngai myit da
Nu yan Wa hpe bau na nga,
Malay ga du ai grai na sai
Num la ten mung lai wa nga ai,
Manang ni law law lu
Mayu kasha gaw tam n mu,
Wunpawng Shayi ni grai tsawm ai
Mut Tsawm hpe gaw gadai n ra ai,
Nu a kanam hkrai tam di nga
Ngai a kan gaw yawm she yawm wa,
Nu a kanam hkrai tam di nga n mai
Shat kan mung naw jahpring ra ai,
Bungli tam ngu pru hkawm wa
Balik hte she bai katut sha,
N tan a matu ngu mahkawng da
Balik ni e yawng la kau ya,
Myit n dik let gawk de wa
Yup mang pi she n tsawm mat hkra.
Manang ni n gun jaw ai wa
UN lu hkra galaw u nga,
KRC de phone matut yu
Chyawm she matsa wa ai lu,
Manang ni bai n gun jaw ai wa
KRC de she hkum nan sa su nga,
Myit shaja let KRC de sa wa
Zaw kaba law ai she hkat da a hka,
UN jaw sai nga bai gabrawng
Ngai mi lawm kun ngu n shung si she rawng,
N dai lang gaw lu na sai ngu myit mada
Tim ngai a mying gaw n lawm mat a hka,
KRC rung de ngai bai matut
Myit hkum daw she bai nga katut,
Bungli de bai madung dat
Lauban wa e du bai manat,
Nu yan Wa hpe bau na ngu myit da
Ngai a kan pi ganoi n hpring nga,
Nu yan Wa mung u gut gu wa na sai
Ngai mung n gup mun rep ram sai,
Nu yan Wa hpe galoi mung dum nga ai
UN mung dai ni du hkra n lu ai,
Wunpawng shayi langai ngai mu da
Nu a kanam rai sai ngu ngai myit la,
Hkri Shawng ngu hkan sha ga
UN lu sai i she bai nga,
Ngai gaw UN n lu
Nu a kanam mung tam n mu,

Shd. Mut Tawm
17th July, 2009 (8:12PM)

MAIJA YANG

Wun Pawng Mungdan kata
Maija Yang ngu ai mi nga,
Pawt pawt madaw she shawng shai
Mi hprap wan ni mung ka manawt ai,
Prat dep n ta ni shachyaw
Pyaw ginra ni mung law,
Matut mahkai mung grai loi
Miwa ni a den hwa hkrai,
Computer jawng ngu ai mi nga
Myu Sha ni hpe myi hpaw ya na,
Kani ninghkap madun gawk mung galaw da
Ya hki ni mung grai she naw law nga,
Wun Pawng Shayi ni grai law
Miwa ni gaw mi she manaw,
Bau shang ni mung nga
Wun Pawng Shayi ni chyu sha,
Wun Pawng Shayi she ngu
Miwa ga she shaga pru,
E hkau ngu shaga
Beer seng de she sa ga nga,
Gumhpraw loi lu n mai
Hpai da wang de hkrai,
Grau lu na hpe myit mada
Myi man hkyung hkyung rai n ta wa,
Myu Sha ni kum shu yi de sa
Miwa wa mare sin na,
Wun Pawng ni a Maija Yang wa
Pyaw chyai na shara she rai a hka,


Shd. Tawk Hkam
16th July,2009 (9:29pm)
Bau Shang = Sumla hkrung yu na matu galaw da ya ai gawk kaji ni
Den hwa = Telephone

MUT TSAWM TSAW RA AI “NU”

Mut Tsawm hpe shangai shaprat ai Nu
Mut Tsawm a tsaw ra dik ai Nu

Myi sha mi tu tu rai tim, Nu a Kasha Mut Tsawm nga
Nyep gaw baw baw rai tim, Nu a Kasha Mut Tsawm nga
A chyang hkret hkret mi rai tim, Nu a Kasha Mut Tsawm nga
Ga n madat ai rai tim, Nu a Kasha Mut Tsawm myitsu ai nga
Laika n dang hkan rai tim, Nu a Kasha Mut Tsawm grai ram ai nga
Jawng na sara ni shaga gatut tim, Nu a Kasha Mut Tsawm grai byin ai nga

Hpaji jawng de Mut Tsawm lahkam sai, Nu a myi ma mani sai
Jawng kaji kaw na Mut Tsawm lawt, Nu mung kabu gum lawt
Lapran tsang de Mut Tsawm du, Nu mung arawng lu
Tsang shi hpe Mut Tsawm awng, Nu gaw yawng yawng hpe shakawng
Dakkasu de Mut Tsawm du, Nu she janmau lu
Maigan de hpaji sharin na Mut Tsawm pru, shakawng na Nu gaw mare de shamu
Myu Sha lam hpe Mut Tsawm gun hpai, Nu a myi man grau pa sai

Tim daini...,
Nu hpe Mut Tsawm kau da, maigai ga de du hkawm mat wa
Nu, Mut Tsawm hpe marit nga na sai, Mut Tsawm mung Nu hpe dum dik ai
Nu, Mut Tsawm hpe shing ran nga na sai, Mut Tsawm mung Nu hpe hkrum mayu ai

Mut Tsawm a Nu hkam ja nga u ga
Mut Tsawm a Nu ngwi pyaw nga u ga
Mut Tsawm a Nu hpe Karai Wa bau sin ya u ga

Nu a Kasha Mut Tsawm kyu hpyi ya dat ai, Nu

Nu a Kasha
Mut Tsawm
24th June, 2009

WA

Annau ni hpe bau maka, lu na sha na Shi jaw ya
Annau ni a lata hpe gindun, hpaji jawng de lam madun
Bu na hpun na hpa tsang n ra, yawng hkum zup hkra lajang ya
Masha a hpang n hkrat u ga nga, annau ni hpe tut e n gun jaw ya
Myu htung hkring hpa n malap hkra, Shi tut e lam madun ya
Chye chyang kun hpan wa u ga nga, Shi a shing ma hpe lam nyep ya
Annau ni kaw si hpang gara na hpe Shi n ra, Jan, marang hte aten Shi n la ta
Karai Kasang hpa hkrit hkungga chye u ga nga, makam masham lam hpe Shi sharin ya
Yu yak jam jau lam ni hpe Shi hkrum, annau ni a man hta galoi mung mani sum
Lamu na htoi tu gintawng kaba, annau ni a Wa nan rai nga
Wa e,
Wa a chyeju hpe tut e dum shai, annau ni galoi ma n malap ai
Wa arawng lu hkra, annau ni shakut nga
Wa a chyeju hpe htang lu na, annau ni myitsu tsawm htap hkra nga na
Wa myit pyaw myit dik u ga, annau ni Karai Wa kaw kyu hpyi ya na
Wa a tsaw ra ai kasha,

Shd. Mut Tsawm
Malaysia