KRC

Wun Pawng Myu Sha ni law, Malaysia ngu ai mungdan kaw
Wun Pawng Mungdan hpe kau da, Malay ga de hprawng sa wa
Chye ai hku mi tam sha, Malaysia mungdan kata
Dum bru dim bra rai di nga, Wun Pawng Myu Sha ni wa
KRC ngu ai mi hpaw da, Wun Pawng Myu Sha ni a matu nga
Li la ai lit hpe shi gun da, Wun Pawng Myu Sha ni hpe lakawn la na
Wun Pawng ni lawt lu hkra, n sim n sa Shi shakut ya
A ten a hkying shi n yu, Wun Pawng Myu Sha ni a matu
Wun Pawng wa jam jau ai hpe na, lang dat Shi du saw a
Myu baw shang shi n yu, Wun Pawng ni a matu chyu
N kam ai nga di Shi n nga, Wun Pawng ni a matu wa
Wun Pawng ni lawt lu na lam, Maja let galoi ma Shi tam
Wun Pawng ni jahkrit shama, tut e Shi hkrum sha
Sat na nat na nga mung tut, tim hpang de Shi galoi n hting nut
Wun Pawng ni a matu nga, yawng a shawng kaw Shi tsap ya
KRC ngwi pyaw nga u ga nga, tut e ngai kyu hpyi ya
Myit mang ai lam yawng awng dang, tut kyu hpyi ya ding yang

Shd. Mut Tsawm
24th July,2009
"KRC" "Shi" ngu ai gaw KRC magam gun ni yawng hpe tsun mayu ai re.

SAMA HKOI AI NAMPAN

Wunpawng Shayi hpe shachyen la,
Kanam mi she ang taw nga
Shi a tsun shaga lam ni hta,
N myit mada yawng lawm mat sa
Kyang lai len mung grai tsawm ai,
Yawng yawng e jawm shakawn sai
Shi a lam bai sagawn yu,
Sama hkoi ai nampan she lu
Tsaw ra myit a majaw sha,
Matsan dum ai myit ni byin pru wa
Gawng shingyan grai tsawm ai,
Tsaw ra ai lam tsun kau sai
Sum tsaw mung kan kata,
An lahkawng hkrai pyaw di nga
Jing hku jing yu ni shang shanut,
An lahkawng mung nga n ngut
N daw n hka saga i nga,
Ga sadi ni mung tawn da ai wa
Malay ga de run,
Rau sha lata gin dun
Myit mada ai lam ni n byin wa,
Shada n gun jaw hkat let nga
Sama hkoi ai nampan rai ai ngu,
Ngai gaw kawn she kawn ai lu
Malay ga nga ai grai na wa,
Sama hkoi ai nampan mung galai shai wa
Ngai gaw hkum mayu ai myit ni byin pru,
Shi gaw n rau ai aten ni chyu
N myit mada tsin yam letmat shi lu la,
Ngai hpe mung n dum mat a hka
Manang ni ngai hpe tsun shadum,
Laga tam la u nga kaw she jahtum
Na a sama hkoi ai nampan wa,
Grai myit kaba mat sai she bai nga
Ngai gaw myit n pyaw di nga,
Shi gaw manang ni hte alum ala
Sama hkoi ai nampan a matu nga,
Galoi mung ngai akyu hpyi ya

Shd. Mut Tsawm
18th July,2009 (6:54pm)

Manang langai a hkam sha ai lam hpe ka shagawp da ai re

UN = NU A KANAM

Ngai Jinghpaw Shadang wa
Wunpawng Buga hpe kau tawn da,
Gumhpraw tam na ngai myit da
Nu yan Wa hpe bau na nga,
Malay ga du ai grai na sai
Num la ten mung lai wa nga ai,
Manang ni law law lu
Mayu kasha gaw tam n mu,
Wunpawng Shayi ni grai tsawm ai
Mut Tsawm hpe gaw gadai n ra ai,
Nu a kanam hkrai tam di nga
Ngai a kan gaw yawm she yawm wa,
Nu a kanam hkrai tam di nga n mai
Shat kan mung naw jahpring ra ai,
Bungli tam ngu pru hkawm wa
Balik hte she bai katut sha,
N tan a matu ngu mahkawng da
Balik ni e yawng la kau ya,
Myit n dik let gawk de wa
Yup mang pi she n tsawm mat hkra.
Manang ni n gun jaw ai wa
UN lu hkra galaw u nga,
KRC de phone matut yu
Chyawm she matsa wa ai lu,
Manang ni bai n gun jaw ai wa
KRC de she hkum nan sa su nga,
Myit shaja let KRC de sa wa
Zaw kaba law ai she hkat da a hka,
UN jaw sai nga bai gabrawng
Ngai mi lawm kun ngu n shung si she rawng,
N dai lang gaw lu na sai ngu myit mada
Tim ngai a mying gaw n lawm mat a hka,
KRC rung de ngai bai matut
Myit hkum daw she bai nga katut,
Bungli de bai madung dat
Lauban wa e du bai manat,
Nu yan Wa hpe bau na ngu myit da
Ngai a kan pi ganoi n hpring nga,
Nu yan Wa mung u gut gu wa na sai
Ngai mung n gup mun rep ram sai,
Nu yan Wa hpe galoi mung dum nga ai
UN mung dai ni du hkra n lu ai,
Wunpawng shayi langai ngai mu da
Nu a kanam rai sai ngu ngai myit la,
Hkri Shawng ngu hkan sha ga
UN lu sai i she bai nga,
Ngai gaw UN n lu
Nu a kanam mung tam n mu,

Shd. Mut Tawm
17th July, 2009 (8:12PM)

MAIJA YANG

Wun Pawng Mungdan kata
Maija Yang ngu ai mi nga,
Pawt pawt madaw she shawng shai
Mi hprap wan ni mung ka manawt ai,
Prat dep n ta ni shachyaw
Pyaw ginra ni mung law,
Matut mahkai mung grai loi
Miwa ni a den hwa hkrai,
Computer jawng ngu ai mi nga
Myu Sha ni hpe myi hpaw ya na,
Kani ninghkap madun gawk mung galaw da
Ya hki ni mung grai she naw law nga,
Wun Pawng Shayi ni grai law
Miwa ni gaw mi she manaw,
Bau shang ni mung nga
Wun Pawng Shayi ni chyu sha,
Wun Pawng Shayi she ngu
Miwa ga she shaga pru,
E hkau ngu shaga
Beer seng de she sa ga nga,
Gumhpraw loi lu n mai
Hpai da wang de hkrai,
Grau lu na hpe myit mada
Myi man hkyung hkyung rai n ta wa,
Myu Sha ni kum shu yi de sa
Miwa wa mare sin na,
Wun Pawng ni a Maija Yang wa
Pyaw chyai na shara she rai a hka,


Shd. Tawk Hkam
16th July,2009 (9:29pm)
Bau Shang = Sumla hkrung yu na matu galaw da ya ai gawk kaji ni
Den hwa = Telephone

MUT TSAWM TSAW RA AI “NU”

Mut Tsawm hpe shangai shaprat ai Nu
Mut Tsawm a tsaw ra dik ai Nu

Myi sha mi tu tu rai tim, Nu a Kasha Mut Tsawm nga
Nyep gaw baw baw rai tim, Nu a Kasha Mut Tsawm nga
A chyang hkret hkret mi rai tim, Nu a Kasha Mut Tsawm nga
Ga n madat ai rai tim, Nu a Kasha Mut Tsawm myitsu ai nga
Laika n dang hkan rai tim, Nu a Kasha Mut Tsawm grai ram ai nga
Jawng na sara ni shaga gatut tim, Nu a Kasha Mut Tsawm grai byin ai nga

Hpaji jawng de Mut Tsawm lahkam sai, Nu a myi ma mani sai
Jawng kaji kaw na Mut Tsawm lawt, Nu mung kabu gum lawt
Lapran tsang de Mut Tsawm du, Nu mung arawng lu
Tsang shi hpe Mut Tsawm awng, Nu gaw yawng yawng hpe shakawng
Dakkasu de Mut Tsawm du, Nu she janmau lu
Maigan de hpaji sharin na Mut Tsawm pru, shakawng na Nu gaw mare de shamu
Myu Sha lam hpe Mut Tsawm gun hpai, Nu a myi man grau pa sai

Tim daini...,
Nu hpe Mut Tsawm kau da, maigai ga de du hkawm mat wa
Nu, Mut Tsawm hpe marit nga na sai, Mut Tsawm mung Nu hpe dum dik ai
Nu, Mut Tsawm hpe shing ran nga na sai, Mut Tsawm mung Nu hpe hkrum mayu ai

Mut Tsawm a Nu hkam ja nga u ga
Mut Tsawm a Nu ngwi pyaw nga u ga
Mut Tsawm a Nu hpe Karai Wa bau sin ya u ga

Nu a Kasha Mut Tsawm kyu hpyi ya dat ai, Nu

Nu a Kasha
Mut Tsawm
24th June, 2009

HKA HKU BUM GA

Hka hku shagawng bum ga,
Chyu rum ni a salum ginra
Jak hkali hpe ngai jawn,
Mali hka hku de ngai nawn
Wun Pawng ni a hkawm sa hkawm wa,
Dai shaloi she ngai mu la
Tinang lit tinang gun hpai,
Ngai gaw n sa kaba shaw sai
Lu Mai* ngu ai shayi sha mi garum la,
Shang lawt hpyen num she rai a hka
Kachyi Htu mare de ngai du,
Htawng shup sheng she ga du
Kabu gara hkap tau la,
Ba ai lam yawng hkoi mat wa
Shagawng Zau ni hte gawdin htawng,
Ngai a lahput yawng malawng
Kachyi Htu hta ngai pyaw,
Len nan mat na zawn law
N ja n hpra hte shakram da,
Ngai a hkrum lam naw matut ra
N Raw Kawng mare ngu ai mi nga,
Pyaw la ai Wun Pawng Buga she rai a hka
Malum tsa pi hte hkap tau la,
Lagawng Bum mung lung kau da
N Rawng Kawng kaw na ngai bai rawt,
Dap Ba ( 1 ) de she mi bai hprawt
Magam gun ni hpe shang shakram da,
Hkawn tsawm langai hte mung hku hkau la
N ja n hpra hte shakram da,
N Gum La de ngai bai rawt sa
Pyaw la ai N Gum La Buga,
Na hte sha na ga ai wa
Dai ni ngai nan she sa du,
Yup mang zawn she nga ai lu
Wun Pawng ni a galaw lu galaw sha,
Bum yi sha naw rai a hka
Shagawng bum ni krin ma wa,
Wun Pawng sha ni ganing di na
N ja n hpra hte ngai kau da,
Hka hku shagawng bum ga hpe wa
Malum tsa pi hpe marit ai,
Hka hku shayi hpe mung dum la ai
Kalang bai sa du na ngai myit mada,
Dai hka hku shagawng bum ga de wa

Shd. Mut Tsawm
15th July,2009(Bat Masum)

* Lu Mai = Ma Gwi re (Myu hte mung dan a matu magam gun hpai nga ai shang lawt hpen num re)
* Sadu hkawm ai Mali hka hku de na hkrun lam hpe shagawp da ai re

WUN PAWNG SHADANG A HKRUN LAM

Wun Pawng Shadang a mying lu,
Jahtawng mung htu sai lu
Jing Hpaw Buga hta nga kaba,
Mung kan hpaji mung sharin la
Myu Sha magam gun hpai nna,
Nu yan Wa mung arawng la
Sawa ni Shang shanut,
Mung dan kata nga n ngut
Wun Pawng Buga hpe ngai kau da,
Thailand mung de ngai hkawm sa
Thailand de shang na maw yang,
Sawa ni e adup shatsang
Hkau Tu N Hkum a chyeju,
Ngai hta kaba la nga ai lu
Thailand kaw na lawt,
Penang ngu ai de she hprawt
2003 February 21
Ngai mung ma un sun hta hkrai
Lauban wa shabrai n kam jaw,
Ngai mung chye ai de mi ga naw
Ngai hkrai lam ntsa e chyai,
Balik ni kabu sai
Sikit Jam(jahkring mi) nga sha ga,
Ngai hta lawm ai yawng jaw da
Lagut damya mung ngai hkrup sha,
Lam makau ai yup kau ra
Manaw manang hte hkrum,
Ngai a myit a alum
A ten ni lai she lai wa,
Malay ga du ai 7 ning de shang wa
7 ning she du wa,
Sen 7 nta de kata
N myit mada KL de du wa,
Gumra a prang pru kajawng ai hpa
Yawng yawng gaw UN nga ja hta,
Ngai gaw mau mau rai n gup sha mahka
Tim ganing n di,
Ngai hkrai sha matut kri
Shara shagu de du,
Kan lahkam mi a matu
N dai zawn, n dai zawn rai
Wun Pawng Shadang ngai
Malay ga mayam tai sai.

Tawk Hkam
8/1/09