Sunday, June 4, 2023

Hi2023

Ngwi pyaw ai nhtoi rai u ga

Tuesday, September 15, 2009

Maigan mungdan de du nga ai manang wa Myu Tsaw hpang de shagun laika,

Tsaw ra hku hkau dik ai manang wa Myu Tsaw hpang de ndai laika hte hkrum shaga dat lu n ngai. Manang wa Myu Tsaw ngwi pyaw hkam kaja ai hte seng ang ai magam bungli ni hpe gun hpai shakut shaja nga na hpe kam ai. Anhte buga de nga ai Myu Sha ni yawng mung ngwi pyaw hkam kaja let sha, tinang hte seng ang ai magam bungli ni hpe n hprai ai sha gun hpai nga ga ai.
Manang wa Myu Tsaw e, Manang wa a Myu hpe tsaw ra ai myit, Mungdan hpe tsaw ra ai myit ni hpe chye lu ai majaw na chying wa kabu myit dik la n ngai, n gun mung lu ai. Manang wa a Myu tsaw, Mung tsaw ai myit masa ni, Manang wa a Myu hte Mungdan n tsa mu mada ai ningmu ni hpe Internet website hkan ya sha sha mu lu ai, grai kaja ai lam ni re.
Rai tim Manang wa Myu Tsaw e, Manang wa a Myu tsaw Mung tsaw ai myit masa ni shai taw nga ai hpe mung mu lu ai. Myu hte Mungdan hpe nau tsaw ra ai myit nau kaba ai majaw rai na re shadu ai. Manang wa a Myu tsaw Mung tsaw ai myit masa ni lam numshe de loi shang taw ai hpe mu lu ai. Dai hpe shading sharai kau dat yang jet ai Myu tsaw myit majing byin wa na re hpe kam ai.
Mungdan kata Myu hte Mungdan a matu magam gunhpai shakut shaja nga ai Ningbaw Ningla ni hpe hkrai mara tam shagun nga yang gaw anhte a Mung dan galoi mung lawt lu lam mu na n re. Ta tut shakut shaja nga ai Ningbaw Ningla ni hte magam gun ni yawng mung Myu hte Mungdan a matu nga n-na gun hpai ap nawng nga ma ai hpe mu lu ai. Shang Lawt nga hte maren Myu hte Mungdan lawt lu na lam hpe n sim n sa shakut nga ma ai. Magam gun ni yawng mung grai chye grai chyang dum na gun hpai nga ai gaw n rai na ma ai, Myu Sha ni a matu, Mung Dan a matu myit n-na gun hpai shakut nga ai ni she rai na re hpe kam ai. Nang, Ngai zawn sha shanhte mung shing gyim masha, sha re ai majaw ra rawng gawng kya ai lam ni nga na gaw lata lahtum n shut nga na ma ai. Shanhte a ra rawng gawng kya ai lam ni hpe sha tam mara shagun taw nga yang gaw hpa lachyum pru na n re. Anhte a Myu Sha ni hte Mungdan mung lawt lu wa na n re.
Dai ni na aten, anhte a Myu Sha ni hte anhte a Mungdan lawt lu na lam grai a hkyak nga sai re. N dai zawn lawt lu na lam hta myit hkrum gahkrin gum din na grai nan ra a hkyak nga sai. N law la ai anhte a Myu Sha ni myit hkrum gum din ai lam n nga ai sha nang shoi nang sha nga n-na shada mara shagun hkat nga yang Myu Sha hte Mungdan lawt lu na lam hta grau grau hkrat sum wa maga de sha re. N dai zawn Myu Sha ni shada n ru n ra byin hkra mung Maigan ni sumprat dawk bang taw nga ai hpe mung dum shai nga ga.
Dai majaw manang wa Myu Tsaw e, ta tut magam gun hpai nga ai ni hpe htaw ra le ra nga mara n sha gun nga ai sha, gara hku galaw sa wa yang awng dang na, gara masa, gara ladat hku galaw yang main a ngu ai ni hpe mahtang hpaji jaw la ga, garum shing tau la ga ngu mayu ai re. Dai rai yang she Magam gun nga ai Ningbaw ni mung n gun lu nna Myu Sha lam hpe grau grau awng dang ai hte gun hpai lu na re.
Manang wa Myu Tsaw e Myu Sha ni hte Mungdan lawt lu na lam hta shada nang shoi nang sha n nga ai sha myit hkrum myit ra ai hte lahkrip ra ra jawm shakut sa wa ga. Dik na hpa mi n lu garum ai rai tim tatut magam gun hpai nga ai ni a matu kyu hpyi ya ai garum shingtau mat wa ga ngu tsun mayu ai re.
Hku hkau ai manang wa Myu Tsaw myit mang galaw sa wa ai lam ni yawng awng dang lu u ga.Anhte a Myu Sha ni hte Anhte a Jinghpaw WunPawng Mung dan mung lawan lawt lu u ga.
Manang wa,

Mut Tsawm
11 Sept, 2009
muttsawm@gmail.com

Saturday, August 29, 2009

MUNG DAN N-NAN TAM HKAWM NGA AI WUN PAWNG NI

Moi jiwoi jiwa ni a prat kaw na, lamu ga manu ai, ga sau namhpun kaja n-na galaw lu galaw sha mai ai buga shara n-nan ni tam la n-na shanu machyu hkawm lai wa sai re. Lamu ga shara lu na matu, lamu ga gashun ai majan ni mung nga lai wa sai.N-dai zawn, Wun Pawng Myu Sha ni gaw buga shara mi kaw na shara mi de htawt hkrat wa n-na dai ni na n-htoi hta tsawm htap manu dan ai, gasau namhpun kaja ai, manu dan n hprang sut rai ni su ai, hpun kawa hte nam shu nam shan ni sawng ai Wun Pawng Mung Dan hpe lu madu la sa ga ai re.
N-dai zawn manu dan tsawm htap n-na nga pyaw ai mung dan hpe madu da nga ning len dai ni na ten hta Wun Pawng Myu Sha ni wa myit ru, myit tsang lam ni hte madu a lamu ga kata ru yak jam jau lam ni hpe a hpum da let sak hkrung nga ra nga ga ai. Ten shagu hkrit maja let galaw lu galaw sha ra nga ga ai. Hkawm sa ra nga ga ai.
Madu a mung dan kata galaw lu galaw sha, tam lu tam sha yak wa ai a majaw tinang a mung dan, tinang a dai daw buga hte jing hku jing yu, manaw manang ni yawng hpe shakram kau da n-na, galaw lu galaw sha mai ai, tamlu tam sha loi ai chya sam ni a mung dan de pru hkawm sa wa ra saga ai. Hting bu mung dan ni rai nga ai, Thai, India, Miwa hte Malaysia mung dan ni hkan de sa du machyu nga wa saga ai re. Grau n-na Thai hte Malaysia mung dan ni hta Wun Pawng Sha ni lani hte lani grau grau law htam jat wa nga sai.
N-nan daw de na n-dai hku rawt hkawm pru sa wa ai a yaw shada lam gaw, ja gum hpraw tam na matu, lu lu, lu lawm lam a matu sha rai nga ga ai. Tim dai ni na n-htoi hta gaw u-ga yaw shada lam law law hte Wun Pawng Sha ni Wun Pawng Mung dan kaw na pru hkawm sa wa nga ma sai. Grau n-na Malaysia mung dan de Wun Pawng Sha ni, hka maw ru zawn rai she ru shang bang wa nga ma ai. Matut na mung naw ru shang wa na re hpe kam ai. N-dai zawn ru shang bang wa ai hta tara shang ai hku lam mi, tara n shang ai hku lam ni rai du shang wa ai hpe mu chye lu ai.
Grau n-na, n-dai zawn ru shang bang wa ai hta, asak aprat ram ai Wun Pawng Mung dan hte Wun Pawng Myu Sha ni a myit mada shara rai nga ai ramma ni she malawng ai hpe mung mu chye lu ai. Ya na zawn du sa wa ai ni hta na ganoi yawng ngu na daram gaw (yawng ngu tsun tim pi n-shut na re) laga maigan mung dan kaba de lu matut hkawm sa na ni chyu re ai lam hpe mung mu chye lu ai. Lu matut hkawm sa hkra mung galaw nga ma ai, shakut nga ma ai. Law law wa mung maigan mung dan kaba (third country) ni de sadu shanu nga na matu a hkaw a hkang lu nna pru hkawm mat ma sai hpe mu chye lu ai.
Wun Pawng Mung Dan a kam hpa shara, Wun Pawng Myu Sha ni a myit mada shara ni rai nga ai Wun Pawng Ramma ni law law wa n dai zawn maigan mung dan kaba ni de hkrai sadu chyam bra shanu nga mat ma yang gaw, Wun Pawng Mung Dan a shawng lam gam maka wa gara hku rai wa na a ta? Asak kaba sai Kanu Kawa, gumgai dingla ni hte ma kaji ni hpe sha Wun Pawng Mung Dan hpe sin nga ta sha ngun na i? Shan hte a lata hta kam hpa myit kaba hte Wun Pawng Mung Dan hpe ap tawn da sa na ga ai i?
Wun Pawng Mung Dan hpe makawp maga na n-ra saga ai ai kun? Tsaw ra hkung ga ai Kanu Kawa ni mung n dai lam ni hpe sung sung chyawm myit yu nga ga. Zet let kung hpan ai, atsam marai rawng ai kashu kasha ni hpe maigan mung dan ni de chyu sa kau sana kun? Nga mu nga mai ai lam hpe yaw shada let tinang a kashu kasha ni hpe maigan mung dan ni de sa na a hkaw a hkang jaw ai, n-lu lu sa hkra mung lam a myu myu hku shakut lajang ya nga ga ai. Maigan mung dan ni de du nga ai kashu kasha ni shagun jaw ai ja gumhpraw hte nga mu, nga mai ai ni mung gaw nga na re. Kashu kasha ni maigan de du nna masha a man hta arawng lu ai lam ni mung gaw nga na re. Tim, anhte a Wun Pawng Mung Dan kata Wun Pawng Myu Sha ni gaja wa jet ai nga mu nga mai lam, kup zup ai myit pyaw myit dik lam ni hpe lu nga ga ai kun ngu ai hpe mung myit yu sawn yu nga ga. Wun Pawng Mung dan kata Wun Pawng Myu Sha ni a shara hta u-ga chya sam masha ni hkrai shara la, shang wa nga ma sai. Wun Pawng Myu Sha ni a mung dan hpe chya sam myu ni madu up sha nga wa ma sai.
Dai ni na n-htoi hta anhte a mung dan hpe makawp maga na, hkye la na grai ra nga sa ga ai. Gara kaw na n gun a tsam hte hkye la na kun, makawp maga na kun. Asak kaba sai gumgai dingla, kanu kawa ni hpe shawng lam majan hpa de rawt sha ngun na i. Ma kaji ni hpe sinat, n-htu hpai sha ngun na i. Shing n-rai, anhte a mung dan hpe mahtang chya sam myu ni a lata de ap jaw kau da sa na i? Shing n-rai Wun Pawng Sha ni lamu ga n-nan mahtang bai tam wa ai kun?
Wun Pawng Mung Dan hta lai n-na tsawm htap manu dan ai la ga n tam ai sha lu da sai madu mung dan hpe makawp maga ga, gaw gap ga. Wun Pawng Mung Dan hpe teng man ai sim sa lam lu hkra, jet ai ngwi yaw lam lu hkra shakut ra ai hpe dum nga ga Wun Pawng Sha ni.

Mut Tsawm
28th August, 2009

Tuesday, August 25, 2009

Wun Pawng Shayi - tsawm la ai ngu yang

Mungkan n tsa hta Wun Pawng Shayi daram si mani tsawm htap ai hte sari rawng ai n nga ai ngu a rawng la lai wa sai. Chya sam myu sha ni a man hta mung a rawng la shakawng lai wa sai. Manaw manang ni a tsun a dawt ai lam ni hpe mung law law lang hkrum sha lai wa sai. Tim n dai laika hpe n ka shi ai ten du hkra Wun Pawng Shayi ni a maga de jan rai naw tsap nang nga ai re.
Lana mi na nhtoi hta manam wa a ga san hpe gara hku htai ya na hpe n chye mat, mak mat lai wa sai. Ngai a myit hta yawn ai myit ni, gaya ai myit ni byin pru lai wa sai. Ngai manu shadan tawn ai, Ngai arawng la ai Wun Pawng Shayi ni wa manam manang wa a ga san hpe n lu htai ya, n chye htai ya mat hkra galaw kau dat ya ma sai.
Dai shana hta Ngai a Bar kaw tsa gayau ai bungli hpe galaw nga yang, Ngai a tsa Bar shawng na Beer Bar kaw Ngai manu shadan ai Wun Pawng Shayi lahkawng sa dung let Beer sa lu taw ai hpe mu dat n ngai. Jing hpaw ga she sheng nga hkra sa garu dung nga ma ai. Buhpun mawn sumli ai lam hta prat dep ai she ngu na kun? prat hpe hkan sha chyut ai she ngu na kun?.. gadun sai i gadun sai nga labu hpe she lata bu sa ma ai, Ngai a nya ai majaw rai na kun?.. Ngai pi n chye shamying ai palawng (palawng ngu pi tsun n mai ai) hpe sha shakap tawn rai Beer lu dung nga ma ai le. Maigan myu sha ni a lapran lata kaw malut hka yawm sha mi matep kau rai a pyaw taw nga ma ai. Aw ... sari rawng la ai Wun Pawng Shayi ni!!!
Beer Bar kaw sa dung lu nga ai manam ni gaw, Shat Nga kasha hpe htim a mya sha hkyen ai Sharaw a myi zawn rai, dai Wun Pawng Shayi yan hpe a zi yu nga ma ai hpe ngai mu lu n ngai. Ngai a Bar kaw sadung lu nga ai manam ni a myi mung dai Wun Pawng Shayi yan hpang de chyu du mat nna, tsa gawm hpe hta lang pi malap nga ma ai. Ngai a Bar kaw na manam ni Ngai hpe hkap san shajang ma ai hta..,
“dai yan hpe nang chye ai i ...?”
“gara kaw na rai ma a ta ...?”
“...........................................?”
“...........................................?”
“...........................................?”
Shan hte a ga san ni hpe Ngai Wun Pawng Shadang langai gara hku htai ya na rai ta..? Anhte a Wun Pawng Shayi ni re nga arawng mi a lu Ngai tsun dan ra na i? Nye a amyu ni re ngu n gun mi alu rai htai ya ra na i? Nang Wun Pawng wa Ngai a shara kaw Nang lama rai yang ganing ngu htai ya na rai ta?
Ngai gaw manam ni hpe dai ni hpe ngai n chye ai ngu myit yawn la let htai dat ya n ngai. N dai hku htai dat ya ai a marang e Nye a, a myu hpe Ngai nyet kau sai kun? Wun Pawng Shayi ni hpe masha maigan wa a man hta nyet kau ai tai mat sai kun? Dai hku byin mat ai rai yang mung Wun Pawng yawng hpe mara raw ya rit ngu hpyi lajin dat lu n ngai. Ngai tsaw ra manu shadan tawn ai Wun Pawng Shayi yen Ngai hpe chye na ya na hpe kam ai. Wun Pawng Myu Sha ni yawng mung ngai hpe chye na ya na hpe kam ai. Wun Pawng Shayi ni myi hpaw, na na wa ai ngu na i? Wun Pawng Shayi di prat dep wa masai ngu hkap la ra na i?
Wun Pawng Shayi yan e Nan lu bang dat ai Beer hte rau Nan a sari, Wun Pawng Shayi ni yawng a sari ni hpe lu bang shalawm kau ai hpe dum nga ai kun? Nan nat shamawng kau dat ai malut hkayawm hte rau Nan a arawng sadang, Wun Pawng Shayi ni yawng a arawng sadang ni yawng hpe nat shamawng kau ai hpe dum nga ma ai kun? Prat ting makawp maga lai wa ai sari sadang ni hpe jahkring na laman shamat kau sa na ma ai kun?
Ya na zawn lu sha ai hpe mara ngu tsun ai n re, Nan lu sha ai hpe mung mara ngu n mu ya n ngai. Lu ga sha ga, pyaw chyai ga. Tim..., shadawn shadang ngu ai hpe chye ga, shara hte masa hpe yu na lu ga, pyaw ga. Lu na sha na matu Madu Karai hpan da ya ai zawn, kaja ai hte n kaja ai hpe gin hka chye na myit nyan hpaji hpe mung Madu Karai jaw da ai hpe gaw n malap kau ga. Wun Pawng Shayi ni a sari hpe nan a majaw sha n shayawm, shamat kau ga. Tsawm htap manu dan la ai Wun Pawng Shayi ni a sari hpe makawp maga nga ga. Tsawm htap la ai Wun Pawng Shayi ni a gawng shingyan hpe manu shadan nga ga Wun Pawng Shayi yan e.

Mut Tsawm
24th August, 2009

Hpyi lajin dat ai: : N dai laika hpe n ka ging ai ka kau ai rai yang mara raw ya marit ngu Wun Pawng Shayi ni yawng hte Wun Pawng Myu Sha ni yawng hpe hpyi lajin dat n ngai.

Friday, July 24, 2009

KRC

Wun Pawng Myu Sha ni law, Malaysia ngu ai mungdan kaw
Wun Pawng Mungdan hpe kau da, Malay ga de hprawng sa wa
Chye ai hku mi tam sha, Malaysia mungdan kata
Dum bru dim bra rai di nga, Wun Pawng Myu Sha ni wa
KRC ngu ai mi hpaw da, Wun Pawng Myu Sha ni a matu nga
Li la ai lit hpe shi gun da, Wun Pawng Myu Sha ni hpe lakawn la na
Wun Pawng ni lawt lu hkra, n sim n sa Shi shakut ya
A ten a hkying shi n yu, Wun Pawng Myu Sha ni a matu
Wun Pawng wa jam jau ai hpe na, lang dat Shi du saw a
Myu baw shang shi n yu, Wun Pawng ni a matu chyu
N kam ai nga di Shi n nga, Wun Pawng ni a matu wa
Wun Pawng ni lawt lu na lam, Maja let galoi ma Shi tam
Wun Pawng ni jahkrit shama, tut e Shi hkrum sha
Sat na nat na nga mung tut, tim hpang de Shi galoi n hting nut
Wun Pawng ni a matu nga, yawng a shawng kaw Shi tsap ya
KRC ngwi pyaw nga u ga nga, tut e ngai kyu hpyi ya
Myit mang ai lam yawng awng dang, tut kyu hpyi ya ding yang

Shd. Mut Tsawm
24th July,2009
"KRC" "Shi" ngu ai gaw KRC magam gun ni yawng hpe tsun mayu ai re.

Sunday, July 19, 2009

SAMA HKOI AI NAMPAN


Wunpawng Shayi hpe shachyen la,
Kanam mi she ang taw nga
Shi a tsun shaga lam ni hta,
N myit mada yawng lawm mat sa
Kyang lai len mung grai tsawm ai,
Yawng yawng e jawm shakawn sai
Shi a lam bai sagawn yu,
Sama hkoi ai nampan she lu
Tsaw ra myit a majaw sha,
Matsan dum ai myit ni byin pru wa
Gawng shingyan grai tsawm ai,
Tsaw ra ai lam tsun kau sai
Sum tsaw mung kan kata,
An lahkawng hkrai pyaw di nga
Jing hku jing yu ni shang shanut,
An lahkawng mung nga n ngut
N daw n hka saga i nga,
Ga sadi ni mung tawn da ai wa
Malay ga de run,
Rau sha lata gin dun
Myit mada ai lam ni n byin wa,
Shada n gun jaw hkat let nga
Sama hkoi ai nampan rai ai ngu,
Ngai gaw kawn she kawn ai lu
Malay ga nga ai grai na wa,
Sama hkoi ai nampan mung galai shai wa
Ngai gaw hkum mayu ai myit ni byin pru,
Shi gaw n rau ai aten ni chyu
N myit mada tsin yam letmat shi lu la,
Ngai hpe mung n dum mat a hka
Manang ni ngai hpe tsun shadum,
Laga tam la u nga kaw she jahtum
Na a sama hkoi ai nampan wa,
Grai myit kaba mat sai she bai nga
Ngai gaw myit n pyaw di nga,
Shi gaw manang ni hte alum ala
Sama hkoi ai nampan a matu nga,
Galoi mung ngai akyu hpyi ya

Shd. Mut Tsawm
18th July,2009 (6:54pm)

Manang langai a hkam sha ai lam hpe ka shagawp da ai re